به‌رهه‌مئينانا جۆره‌کێ نوو يێ پلاسته‌ران بۆ بله‌زکرنا ساخبوونا برينان
و ئو ئا: ئومێد محمد بناڤي
ڤه‌کۆله‌رێن ئه‌مريکي جۆره‌کێ نوو يێ پله‌سته‌ران به‌رهه‌مئينان کو دشێت زووتر برينان ساخ بکه‌ت، و خوونبه‌ربوونێ د راوه‌ستينيت هه‌روه‌سا برينێ د پارێزيت ژ په‌يدابوونا هه‌ودانان، ماده‌يێ هاتييه بکارئينان ژي يێ هاتييه وه‌رگرتن ژ چينێ ناڤين يێ قه‌لپکێ برينان يا کو کاردکه‌ت ب ساخکرنا برينێ هه‌روه‌سا پاراستێ ژ ده‌وروبه‌ري.
ڤه‌کۆله‌ران د خواندنه‌کا خوه‌دا يا کو هاتييه به‌لاڤکرن د کومبوونا "ئاي سي ئێس" يا ماده و که‌رسته‌يێن کلينيکي، ديارکر کو خاسله‌تێن چينێ ناڤپۆشێ قه‌لپکێ برينان کاردکه‌ت هه‌روه‌کي پلاسته‌ره‌کا سروشتي، و رادبيت ب راوه‌ستاندنا خوونبه‌ربوونێ هه‌روه‌سا برينێ د پارێزيت ژ هه‌ودانێ و پيسبوونێ، دگه‌ل سه‌رنج راکێشانا خانه‌يێن به‌رپرس ژ ساخبوونا برينان.
هه‌روه‌سا ڤه‌کۆله‌ران ديارکر کو پلاسته‌رێن بووري رادبوون ب راوه‌ستاندنا خوونبه‌ربوونێ و نه‌هێلانا په‌يدابوونا هه‌ودانان بتنێ، لێ وان دڤيان جوره‌کێ نوو به‌رهه‌م بينن کو ساخبوونا برينان بله‌ز بێخيت، د ئه‌نجامدا شيان جوره‌کێ پلاسته‌ران به‌رهه‌م بينن کو نه بتنێ خوونبه‌ربوونێ ب راوه‌ستينيت و برينێ ب راوه‌ستينيت ژ هه‌ودانان، لێ د هه‌مان ده‌مدا ساخبوونا برينان بله‌ز بکه‌ت و زوو برين خوه بده‌نه ئێک. ماده‌يێ بکارهاتي د دروستکرنێ دا هه‌ر وه‌کي وێ ماده‌يێيه يا کو لده‌مێ دروستبوونا قه‌لپکێ برينان دا دهێته به‌رهه‌مئينان.
د پشکنينێن تاقيگه‌هي دا لدۆر له‌زاتييا ساخبوونا برينێ ديارکرن کو له‌زاتييا سه‌رنج راکێشانا خانه‌يێن به‌رپرس ژ ساخبوونا برينان د پلاسته‌رێ چێکريدا هه‌روه‌کي هه‌مان له‌زا سه‌رنج راکێشانا خانه‌يێن قه‌لپکێ برينێيه.
ل دوماهييێ، ڤه‌کۆله‌ر د وێ هيڤييێ دانه کو بشێن د پاشه‌رۆژێدا هنده‌ک ماده و که‌رسته‌يێن نوو دروستبکه‌ن کو بشين جۆرێن جودا يێن خانه‌يان راکێشن دا کو د شياندا بيت نه‌خوه‌شييێن جودا يێن له‌شي ب ئاسته‌کێ باشتر چاره بکه‌ن، مينا چاره‌کرنا تووشبوونێ ب په‌نجه‌شێرێ ب رێيا راکێشانا خانه‌يێن په‌نجه‌شێري، يان ژي بۆ گه‌شکرنا هه‌ستييان بۆ چاره‌کرنا نه‌خوه‌شييێ جودا يێن له‌شي.
0 Comments 
