راهێنانێن له‌ش جوانييێ و ساخله‌مي

راهێنانێن له‌شجوانييێ و ساخله‌مي

سيدرا مزووري


هه‌رچه‌نده‌ گه‌له‌ک هزرێن شاش هه‌نه‌ ده‌رباره‌ي وه‌رزشێن له‌ش جوانييێ د جڤاکێ مه‌ دا، هه‌تا رادده‌يه‌کێ کو ئه‌ڤ جۆره‌ وه‌رزشه‌ هه‌ژماره‌يه‌کا گه‌له‌ک کێم ژ خه‌لکێ مه‌ بخۆڤه‌دگريت ژبه‌رکو ديتنا جڤاکێ مه‌ ژبۆ ئه‌ڤان وه‌رزشان ديتنه‌کا شاشه‌ و پتر ئه‌ڤان جۆره‌ وه‌رزشان گرێ دده‌ن ب هێزێ و حه‌زا که‌سێ وه‌رزشڤان ژبۆ ئاريشه‌يان و شه‌ران، لێ ئه‌ڤ جۆره‌ هزره‌ گه‌له‌ک ژ راستييێ دوورن، و وه‌رزشێن له‌ش جوانييێ دهێنه‌ هه‌ژمارتن ژ وان کارێن کو مرۆڤ پێدڤييه‌ ب به‌رده‌وامي ئه‌نجام بده‌ت ژبۆ پاراستنا ساخله‌مييا له‌شێ خوه‌.

مفايێن وه‌رزشێن له‌ش جوانييێ:.

وه‌رزشێن له‌ش جوانييێ زۆر مفايان بخۆڤه‌ دگريت، و کارتێکرنه‌کا راسته‌وخۆ هه‌يه‌ لسه‌ر هه‌مي ئه‌ندامێن له‌شي. يا ئاشکرايه‌ کو ئه‌و که‌سێ ژيانه‌کا ساده‌ يا بێ وه‌رزش دبۆرينيت له‌شێ وي يێ خاڤه‌ وبێ هێزه‌، لێ ژ لايه‌نێ ساخله‌مييا ئه‌ندامێن له‌شي ڤه‌، گه‌له‌ک خالێن دي يێن نێگه‌تيڤ هه‌نه‌، وه‌رزش بشێوه‌يه‌کێ گشتي دشێت ئه‌رکێ سوورا خوينێ و ئاستێ کارکرنا له‌شي باشتر دکه‌ت، لێ وه‌رزشێن له‌ش جوانييێ ژبه‌کو زۆربه‌ي زه‌ڤله‌کێن له‌شي دهێنه‌ بکارئينان لده‌مێن وه‌رزشێ دا، دشێت ب ئاسته‌کێ مه‌زنتر سوورا خوينێ چالاک بکه‌ت و ئاستێ پالدانا خوينێ ژ لايێ دلي ڤه‌ به‌رزتر و چێتر لێبکه‌ت، د ماوه‌يێن نورمال يێن ژيانا مرۆڤي دا، دلێ مرۆڤي 5 ليترێن خوينێ د ماوه‌يێ خۆله‌که‌کێ دا پالدده‌ت و به‌لاڤه‌ دکه‌ت ژبۆ گشت ئه‌ندامێن له‌شي، لێ د ماوه‌يێن وه‌رزشێ دا ئاستێ پالدانا خوينێ دشێت بگه‌هيته‌ 35 ليتران د خۆله‌که‌کێ دا، کو ئه‌ڤ چه‌نده‌ ژي راسته‌وخۆ گرێدايه‌ ب چالاکييا زه‌ڤله‌کێن له‌شي ئه‌وێن کو د ده‌مێ وه‌رزشێ دا د کارکرنه‌کا به‌رده‌وام دانه‌، و ئه‌ڤ زێده‌بوونه‌ د به‌لاڤه‌بوونا خوينێ ژبۆ زه‌ڤله‌کان يا گرێدايه‌ ب ئاڤاکرنا زه‌ڤله‌کان و پاراستنا ساخله‌مييا وان و بهێزبوونا ئه‌ڤان زه‌ڤله‌کان.

وه‌رزشێن له‌ش جوانييێ دشێن ئاستێ به‌رگرييا له‌شي دژي گشت زينده‌وه‌رێن هوور يێن کو دچنه‌ دناڤ سوورا خوينێ دا به‌رزدکه‌ت و ساخله‌مييا له‌شي د پارێزيت ژبه‌رکو ئاستێ چالاکييا ئه‌ندامێن کو دبه‌رپرسن ژ په‌يدابوونا خانه‌يێن به‌رگرييێ زێده‌دکه‌ت، و هه‌ژماره‌يه‌کا پتر ژ خانه‌يێن ساخله‌م يێن به‌رگرييێ دروست دکه‌ت.ئاڤاکرنا زه‌ڤله‌کێن ساخله‌م برێيا وه‌رزشێن له‌ش جوانييێ ئاستێ رووني د له‌شێ مرۆڤي دا کێم دکه‌ت و بکاردئينيت وه‌کي ژێده‌ره‌کێ هێزێ و ب ڤێ رێکێ دشێت مه‌ترسييێن ساخله‌مي يێن کو ئێک ژ ئه‌گه‌رێن وێ روونه‌ کێم بکه‌ت، وه‌کي يا ديار کو قه‌له‌وي يان ژي کێشه‌يا زێده‌ دهێته‌ هه‌ژمارتن نه‌خۆشي، و دشێت ببيته‌ ئه‌گه‌رێ زۆر نه‌خۆشييێن دلي و مێشکي.

هه‌بوونا ده‌مه‌کێ زۆر يێ ڤالا د ژيانا مرۆڤي دا دهێته‌ هه‌ژمارتن ئێک ژ ئه‌گه‌رێن په‌يدابوونا خه‌مۆکييێ و فشارێن ده‌رووني و نه‌ ئارامييێ، ب تايبه‌ت ئه‌گه‌ر کو گه‌هشتبيته‌ ئاستێ رۆتينه‌کا رۆژانه‌، لێ ژبه‌رکو وه‌رزشێن له‌ش جوانييێ بشێوه‌يه‌کێ به‌رده‌وام دشێت جهه‌کێ مه‌زن د ژيانا رۆژانه‌ يا مرۆڤي دا بگريت ناهێليت کو ده‌مێ مرۆڤي ب تشته‌کێ بێ مفا ڤه‌ بوريت، دشێت کارتێکرنه‌کا پۆزه‌تيڤ هه‌بيت لسه‌ر هزر و ده‌روونێ مرۆڤي کو مرۆڤي ژ خه‌مۆکييێ و فشارێن ده‌رووني و نه‌ ئارامييێ دوور بێخيت، و ساخله‌مييا ده‌روونێ مرۆڤي ب پارێزيت ژ هه‌ر جۆره‌ شاشييه‌کێ.وه‌رزشێن له‌ش جوانييێ دشێن ببنه‌ ئه‌گه‌رێ په‌يده‌بوونا ده‌روونه‌کێ ساخله‌م ژبه‌کو وه‌کي ئه‌ز هزر دکه‌م په‌يدابوونا له‌شه‌کێ جوان لده‌ف مرۆڤي دشێت ئاستێ رازيبوونا مرۆڤي ژ که‌سايه‌تييا مرۆڤي به‌رزبکه‌م و دشێت کارتێکرنه‌کا مه‌زن لسه‌ر ژيانا مرۆڤي هه‌بيت و شێوازێ ژيانا مرۆڤي بشێوه‌يه‌کێ پۆزه‌تيڤ بگوهوريت.ئه‌و که‌سێن کو هنده‌ک نه‌خۆشييێن دووم درێژ لده‌ف هه‌ين وه‌کي نه‌خۆشييێن دلي و ره‌بوويێ، پێدڤييه‌ ژ ئه‌ڤان جۆره‌ وه‌رزشان دوور بکه‌ڤن ژبه‌رکو وه‌رزشه‌کا قورسه‌ ژبۆ ئه‌ڤان که‌سان و دشێت ئاستێ به‌لاڤه‌بوونا خوينێ ژبۆ خانه‌يێن دلي کێم بکه‌ت و د ئه‌نجامدا بارێ نه‌خۆشييێ خرابتر بکه‌ت و ئه‌نجامێن دلته‌زين بخۆڤه‌ بگريت، و هه‌روه‌سا د بارێ هه‌بوونا نه‌خۆشييا ره‌بوويێ دا دشێت ببيته‌ ئه‌نجامێ مرنێ ژبه‌رکو ئه‌ڤ جۆره‌ وه‌رزشه‌ د قورسن و دشێن ببنه‌ ئه‌گه‌رێ بێهن ته‌نگبوونه‌کا قورس. يا باشتر ئه‌وه‌ کو ئه‌ڤ نه‌خۆشه‌ ب وه‌رزشه‌کا ساده‌ و سڤک رابن بشێوه‌يه‌کێ رۆژانه‌ دا کو ژ مه‌ترسييێن وه‌رزشێن قورس قورتال ببن و د هه‌مان ده‌م دا بشێن مفايێن ته‌ندروستي ژ وه‌رزشێ وه‌ربگرن.

ساخله‌مييا له‌شێ ته‌ يا گرێدايه‌ ب ساخله‌مييا ده‌روونێ ته‌، ژبه‌ر ئه‌ڤێ چه‌ندێ پێدڤييه‌ هه‌ر که‌سه‌ک ژ لايێ خۆڤه‌ کاربکه‌ت ژبۆ بده‌ستڤه‌ ئينانا هنده‌ک ئه‌نجامان کو بشێت ژيانه‌کا ساخله‌م دوور ژ نه‌خۆشي و نه‌ ئارامييان و فشارێن ده‌رووني بده‌ست خۆڤه‌ بينيت ژبۆ ژيانه‌کا ساخله‌متر...