جۆرێ خوارنا پاشيڤێ کارتێکرنێ ل برس و تێهنا ته دکه‌ت
و ئو ئا: ئومێد محمد بناڤي
ژبه‌رکو ره‌مه‌زانا پيرۆزا ئه‌ڤ ساله دکه‌ڤيته د گه‌رمترين و درێژترين ده‌مێن سالێ دا، چ پێنه‌ڤێت ره‌مه‌زانه‌کا سڤک نابيت ژبۆ گه‌له‌ک که‌سان، و هه‌ستکرن ب برسێ و تێهنێ دێ تشته‌کێ گه‌له‌ک نورمال بيت، لێ دروست هه‌لبژارتنا خوارنا پاشيڤێ، دێ شێت رێکه‌کا گه‌له‌کا ئه‌کتيڤ بيت بۆ پاراستنا ته ژ تێهنيبوون و برسێ بوونێ، ئه‌گه‌ر بزاني کيژان خوارن پێدڤييا ته بۆ خوارنێ کێمدکه‌ت و کيژان ڤه‌خوارن پێدڤييا ته بۆ ڤه‌خوارنێ کێمدکه‌ت.
خوارنا پاشيڤێ دهێته هه‌ژمارتن گرنگترين و ساخله‌مترين دانێ خوارنێ د رۆژانێن رۆژيگريدا، ژبه‌رکو ئه‌ڤ خوارنه دبيته ژێده‌ره‌کێ سه‌ره‌کييێ ژيانێ بۆ ماوه‌يێ چه‌ند ساتێن درێژ يێن رۆژيگرتنێ هه‌تا دبيته ده‌مێ فتارێ. و دروست هه‌لبژارتنا خوارنێن پاشيڤێ يا گرێدايه ب کێمتر هه‌ستکرن ب تێهنيبوون و برسيبوونێ، و ب چ شێوه‌يان نه يا گرێدايه ب بڕێ خوارنێ يا کو مرۆڤ دخۆت لێ ب جۆرێ خوارنێ ڤه گرێدايه، رۆژانێن رۆژيگري ئه‌نجامێن باشترهه‌نه ئه‌گه‌ر هاتو مرۆڤ ب دروستي لدووف ئه‌ڤان رێنماييان بچيت و بجهـ بينيت.
يا باشتر ئه‌وه خوارنا پاشيڤێ بهێته گيروکرن هندي د شياندا بيت، داکو ده‌مه‌کێ کێمتر يێ بێ خوارنييێ هه‌بيت، هه‌روه‌رسا باشتره مرۆڤ بڕه‌کا گونجاي لدووف پێدڤييێن خوه ژ پاشيڤێ بخۆت، ديسان خوارنا ماده‌يێن پڕۆتيني و ريشالي مينا گۆشتي، که‌سکاتييان، فێقييان لده‌مێ پاشيڤێ گه‌له‌ک باشتره ژ خوارنێن دي، ژبه‌رکو دره‌نگ دهێنه بۆهژين د ئاشکيدا و ب ڤي شێوه‌ي ده‌مه‌کێ درێژتر دڤێت هه‌تا کو ئاشک ڤالا ببيت و مرۆڤ هه‌ست ب برسێ بکه‌ت.
سه‌باره‌ت تێهنيبوون، يان ژي هه‌ستکرن ب تێهنيبوونێ، رۆژيگر دشێت کونترۆل بکه‌ت ب رێيا دوورکه‌تنێ ژ که‌شێن گه‌رم و تيشکێن هه‌تاڤێ ب تايبه‌تي د نيڤرۆيان دا يا کو دبيته ئه‌گه‌رێ هشکبوونا له‌شي ژ شله‌يان و هه‌ستکرن ب تێهنيبوونێ.لدۆر هه‌ستکرنێ ب تێهنيبوونێ و بڕێن ئاڤێ يێن مرۆڤ ڤه‌دخۆت، يا باشتر ئه‌وه ژ ده‌مێ فتارێ هه‌تا کو ده‌مێ پاشيڤێ مرۆڤ بڕێن گونجاي يێن ئاڤێ ڤه‌دخۆت و پێدڤي ناکه‌ت بڕێن مه‌زن يێن ئاڤێ لسه‌ر ئێک ڤه‌خۆت، ژبه‌رکو ئه‌ڤ چه‌نده دبيته ئه‌گه‌رێ زێده‌بوونا هژماره‌يێن ميزتنێ و کێمبوونا ئاستێن ئاڤێ د له‌شي دا و زێده ده‌رکه‌فتنا ئاڤێ دگه‌ل ميزتنێ. هه‌روه‌سا يا گرنگه مرۆڤ خوه ژ خوارنێن سوور دووربێخيت لده‌مێ پاشيڤێ ژبه‌رکو ماده‌يا سۆديوم يا کو دناڤ خوێ دا هه‌يه دبيته ئه‌گه‌رێ هه‌ستکرنێ ب تێهنيبوونێ، ژبه‌ر ڤێ يه‌کێ خوارنێن سوور لده‌مي پاشيڤێ نه خوه.لدوماهييێ، يا باشتر ئه‌وه ژ ڤه‌خوارنێن پڕي کافايين دوورکه‌ڤين مينا چايێ ژبه‌رکو کارتێکرنه‌کا کوژه‌ک هه‌يه لسه‌ر ئاستێ ئاڤێ د له‌شيدا، و دبيته ئه‌گه‌رێ هه‌ستکرنێ ب تێهنيبوونێ. ديسان يا گرنگه فێقييێن جوره‌وجور بخۆين بۆ بلندکرنا ئاستێ پۆتاسيۆمي د له‌شيدا کو هه‌ستێ تێهنيبوونێ لده‌ف مرۆڤي کێمدکه‌ت.
0 Comments 
