ڤۆلتارين و نه‌خوه‌شيێن دلي
و ئو ئا: ئومێد محمد بناڤي
هه‌روه‌کي ئه‌م هه‌مي دزانين که‌سێن خوه‌دان نه‌خوه‌شييێن دلي نه‌شێن هه‌مي جۆرێن ده‌رمانان وه‌ربگرن د ده‌مێن جودا يێن ژيانا خوه‌دا، ژبه‌رکو چێدبيت هنده‌ک ده‌رمان و حه‌پک ببنه ئه‌گه‌رێ کارتێکرنێن جوره‌وجور لسه‌ر ساخله‌مييا دلي وان و د ئه‌نجامدا ئه‌نجامێنکوژه‌ک لسه‌ر ساخله‌مييا نه‌خوه‌شي هه‌بن، ئێک ژ ده‌رمانێن به‌رنياس کو دبنه ئه‌گه‌رێ مه‌ترسييێن کوژه‌ک د نه‌خوه‌شێن دليدا؛ ده‌رمانێ "ڤۆلتارين"ه يا پێکهاتي ژ ماده‌يێ "ديکلۆفيناک سۆديوم"، ئه‌ڤ ده‌رمانه يا کو کاردکه‌ت ب کێمکرنا پرۆسيێسێن هه‌ودانێ د له‌شي دا و کارتێکرنێ لسه‌رنته‌رێ ئێشانێ دکه‌ت و ئێشانێ لده‌ف نه‌خوه‌شي ناهێليت، دشێت ئه‌نجامێن کوژه‌ک هه‌بن د نه‌خوه‌شێن دليدا.که‌سێن خوه‌دان نه‌خوه‌شييێن دلي ل وه‌لاتێ "بريتانيا"؛ به‌رده‌وام دهێنه شيره‌تکرن ده‌رباره‌ي دوورکه‌تنێ ژ بکارئينانا ده‌رمانێ "ڤۆلتارين"؛ هه‌روه‌کي رێکخه‌رێن ساخله‌مييێ ل وه‌لاتێ ناڤبري ديارکرين، ژبه‌ر کو ئه‌ڤ ده‌رمانه دشێت ببيته ئه‌گه‌رێ جه‌لته‌يێن دلي يان ژي يێن مه‌ژييێ، ئه‌گه‌ر هاتو که‌سه‌کێ خوه‌دان نه‌خوه‌شييێن دلي وه‌ربگريت ژبۆ هه‌ر چ ئه‌گه‌ر بيت.ئه‌ڤ چه‌نده هاته به‌لاڤکرن ده‌ما کو ليژنه‌يا ساخله‌مي يا ئه‌ورۆپي باوه‌ري پێ ئيناني. هه‌ژي گۆتنێ يه ب مليۆنان خه‌لک ئه‌ڤي ده‌رماني وه‌ردگرن ژبۆ جوره‌ها ئێشانان مينا سه‌ر ئێشانێ، پشت ئێشانێ و هه‌تا دوماهييێ.ئاژانسا رێکخه‌رێن ساخله‌مي و ده‌رمانان MHRA داخۆياکرن کو ئه‌ڤ ده‌رمانه ب چ شێوه‌يان پێدڤييه نه‌هێته وه‌رگرتن ژ لايه‌يێ که‌سێن خوه‌دان ئێشێن دلي يێن مه‌ترسي، هه‌روه‌سا ژ کارکه‌تنا دلي، جه‌لته‌يێن دلي و يێن مه‌ژي، ئه‌گه‌ر هاتو نه‌خوه‌ش ئه‌ڤ ده‌رمانه وه‌رگرتبيت، پێدڤييه ب ئێکجاري ژ بکارئينانا ئه‌ڤێ ده‌رماني دووربکه‌ڤن.ژ لايه‌کێ ديڤه، که‌سێن جگاره‌کێش، خوه‌دان فشاره‌کا خوونێ يا به‌رز، نه‌خوه‌شييا شه‌کرێ و ئاستێن روونێ يێن به‌رز پێدڤييه بتنێ ئه‌ڤي ده‌رماني بکاربينن پشتي سه‌ره‌دانا نۆشدارێ خوه‌يێ تايبه‌تمه‌ند بۆ زانينا مه‌ترسييا بکارئينانا ده‌رماني.هه‌ژي گۆتنێيه کو MHRA دبێژيت؛ کو ده‌رمانێ ڤۆلتارين ئێک ژ باشترين ده‌رمانێن راوه‌ستييانا ئێشانێ يه د هه‌مي که‌سان دا ژبلي که‌سێن "خوه‌دان مه‌ترسي" ژ بکارئينانا ده‌رماني.رێڤه‌به‌را MHRA؛ نۆشدار "سارا برانچ" دبێژيت کو هه‌رچه‌نده هه‌مي گاڤان ده‌رمانێ ڤۆلتارين پێدڤييه نه‌هێته بکارئينان د که‌سێن خوه‌ن مه‌ترسييێن ساخله‌ميدا، لێ دگه‌ل ده‌مي گه‌له‌ک ڤه‌ديتنێن نوو دهێنه به‌لاڤکرن و جێدبيت د هه‌يامێن داهاتي دا رێکێن نوو بۆ دانا ئه‌ڤي ده‌رماني بهێنه ديارکرن لسه‌ر بنياتێن جودا ژ يێن ناڤبريزل دوماهييێ، شه‌ش مليۆن بارێن ده‌رمانێ ڤۆلتارين يێن هاتينه وه‌رگرتن ژ لايێ خه‌لکيڤه د سالا بووريدا، و هه‌روه‌سا ئه‌ڤ ده‌رمانه ل هه‌مي جهان دهێنه فرۆتن و دشێن بهێنه وه‌رگرتن بێي پێتڤيبوون ب راشێتا نۆشداري.
0 Comments 
